Me la ricordo la Reina!
di Cristina Radivo (mamaspide)

Me la ricordo la Reina! Che dona, che prof.

Xe sta’ i più bei ani dela mia vita. Iera el ’66, la Reina, la gavevo per capoclasse, Molesi tentava de insegnarne storia, Carà el iera coi grandi dele superiori. ‘Ndavo ale medie, al Nordio; no gavevimo aule ma coss’che me son divertida!

Iera le prime medie unificate, e ierimo l’unica scola de Trieste che gaveva classi miste, mas’ci e femine insieme; xe, che ierimo talmente pochi che no i rivava far due classi separate! El preside iera Barochi, Romano Barocchi; el iera come Sputafuoco.

Filippi fazeva de bidello; el vendeva merende vere, no sotovuoto, come desso. Se podeva comprar quel che se gavevimo dimenticà, vegnindo in furia a scola: cartele de disegno, penini, matite, quaderni, chine, tempere e penei.

L’Oberdan e‘l daVinci ne prestava le aule; se spoiavimo de una parte e po’ andavimo a far lezion de quel’altra. De inverno iera una “belleza”; ma ierimo pìci, e no sentivimo tanto el fredo. Inveze, se iera bel tempo, fazevimo lezion fora, in prà, vizin la “piscina”, all’aperto.

I laboratori de tessile e metalli, i iera nele barache che gaveva lassà i ‘mericani, co’ la stua a legni per scaldarse e per brusar le scovazze. Andavimo con quei dele superiori, per zercar de capir e sperimentar cossa che ne gaveria piasso far dopo, de grandi.

La Reina ne insegnava materie artistiche, fazevimo un scandal cola creta e ‘l polistirolo.

La ne lassava scoltar musica col mangianastri durante le lezioni, e noi daghe: bitles e roling ston...La fumava come un turco; sempre co’ sta cica in boca, le Marlboro sempre sula catedra e zenere per tuto.

Ghe volevimo un ben del’anima, mi almeno, ma anche i altri. La iera speciale, la aveva ‘sta vose bassa, rauca, i ociai che pareva do’ fondi de botiglia.

In primavera la se meteva un completin gialo, damascado, la cotola de stofa più pesante ma col stesso disegno dela camisa, con due pice spile sula cusidura dela maniga, due cocinele. E co la rideva la gaveva una luce ‘ntei oci! Che bela dona che la iera, specie de dentro!

Xe sta’ i più bei ani dela mia vita; a dir el vero, per mi, anche i più bruti. Tut’in tun me se gà ribaltà el mondo ‘dosso.

Go dovuto molàr scola e son ‘ndada a lavorar de comessa; iera el feminismo, le minigone, i gaveva ‘pena inventà i colant. La Reina vegniva qualche volta a trovarme in negozio, per saludarme…

‘Ncora desso, qualche volta, la me manca; ma son orgogliosa de averla conossuda, de esser stada, magari solo per due ani, una sua alieva.

Chi ’ssa come che la se la ridi, dove che la xè ‘desso, chi ‘ssa cos’che la se sta inventando…

Grazie prof. Per quel che te ne gà dà, nel mio cuor xè sempre un postisin per ti.